الفن والأدب سارة سلامة تكشف حقيقة ما تردد عن تعرضها للضرب من والدها سارة سلامة الأربعاء - 11 مارس 2026 - 01:33 ص بتوقيت عدن - المرصد خاص حلّت الفنانة سارة سلامة ضيفةً على برنامج "كشف حساب" الذي تقدّمه الإعلامية إنجي هشام على قناة "هي"، حيث كشفت عن طبيعة علاقتها بوالدها الفنان أحمد سلامة، وكيف تستشيره في أعمالها الفنية، كما تحدّثت عن الفنان محمد رمضان ودوره في مسيرتها الفنية ونصائحه لها، وأوضحت أيضاً حقيقة خضوعها للتجميل. وقالت سارة: "بابا صاحبي جداً، ولما الناس بدأت تنتقد كتير، بيتقال حاجات مش حقيقة، إنه ضربني وضربنا بعض، معرفش الناس بتجيب ده منين، بابا ده صاحبي، وبحب الصحوبية معاه وصديقي المقرّب وهو مش قاسي حنين جداً وبيقف مع الناس وبيعرف إزاي بيتعامل مع المرأة". وأضافت: "كنت اتظلمت الفترة الأولى لما دخلت التمثيل، بسبب الجرأة وكنت صغيرة ولسّه بتعلّم، وبابا لما كان يشوف ده يقول متمردة، ولو حصل منه حاجة أو علّق على برنامج بعاتبه وأقوله أنت ليه شايفني كده وأسمع رأيه، وهو لو إيه حصل بييجي يصالحني". سارة سلامة تتحدث عن علاقتها بمحمد رمضان ومحمد رجب وتحدثت سارة سلامة عن علاقتها بالفنان محمد رمضان وصداقتهما بعد نجاحهما في مسلسل "ابن حلال" قائلةً: "محمد رمضان صديق مقرّب ليا جداً وبشوف إنه وشّ السعد عليا، بحب أتكلّم معاه وآخد رأيه في كل حاجة، وبيدّيني أمل في الحياة ومبيخليش حاجة تأثّر، بيخلّيني عايزة أقوم أكسّر الدنيا، ومش هيجي زيّه تاني في التمثيل... هو مش بيستفز الناس، هو طيب جداً ولكن في ناس شغلها في الحياة أنها تنتقد، لو عملتي عمرة ينتقدوا، لو اتحجبتي وقعدتي في البيت دول مش هنخلص منهم". كما أكدت سارة أن الخلاف بينها وبين الفنان محمد رجب قد انتهى، وبخاصة بعد تصريحه "مش هشتغل معاها تاني"، حيث قالت: "محمد رجب طيب وممثل رهيب واتصافينا مبقيناش متخانقين وجه واتأسّف لي وقبلت، اختياراته حلوة ولكن في ناس بتخاف إنها تغيّر في المسلسلات مع إنو ممكن لو غيّرت أنجح على فكرة، بيخافوا من الريسك، مش هو بس في ناس كتير كده". سارة سلامة: تعرّضت للانتقاد بعد مسلسل "نقطة سودا" وكشفت سارة سلامة كواليس مشاركتها في مسلسل "نقطة سودا"، وتعرّضها للكثير من الانتقادات بسبب شكل الشخصية التي تقدّمها خلال أحداث المسلسل. وقالت سارة: "كان في هجوم عليا وقت مسلسل "نقطة سودا"، مافيش حد محدّد عمللي الحملة دي، الشخصية في المسلسل دور واحدة مستفزة وشريرة كمان، بعمل دور وبأدّيه ومش طبيعة حياتي عايشة كده بالميك آب، المسلسل من أصعب الأعمال اللي عملتها في حياتي، وظروف تصويره مختلفة، وكنت بصوّر في لبنان والحرب شغّالة وكنا بنسمع صوت الصواريخ وقت التصوير". وعن خضوعها لعملية تجميل، قالت سارة: "قالوا غيّرت ملامح وشي، اتضايقت جداً وأنا معنديش مشكلة في الانتقاد ولكن يكون بشكل محترم، ليه أتهان!؟ في الآخر إحنا بني آدمين بأدّي دور اتطلب مني، وأكيد لو في أي عيب حواليا ناس كتير لو ينبهوني، الميك آب بيتعمل بيه مليون حاجة". وعلّقت سارة سلامة على حصرها في أدوار معينة منذ دخولها عالم التمثيل، قائلةً: "معرفش الناس مركزة معايا من ساعة ما بدأت تمثيل، معرفش ده تركيز زيادة من الناس، وممكن بدايتي في سن صغيرة، عملت أدوار كتير جداً بشخصيات مختلفة نفسي أخرج من البنت الشيك الجميلة الهادية، ظلمتني شوية، في الأول كنت مبسوطة بده ورجعت قولت ممكن ألعب حاجة غيرها، وده دور المخرجين برضو إنهم ميكرروش الشخصية للفنانة، نفسي أحط بنت متحطش ميك آب خالص وعايشة في الشوارع وبتقابل مواقف حقيقية".